Pituah minang- 7 Tando- Tando Urang Babudi Bamartabat

manuriuk urang cadiek pandai, adolah tujueh tando- tando urang babudi bamartabat. Yaitu:

11.>     Kalau mangecek bahakimah

Bapikie apo nan patuik kadikatokan tapi pantang mangatokan, kecek lamak indak manggiesie, kato boneh mamaliharo. Kok bana indak tabandiang, kok kareh indak tasolang, jadi panawa dek rang banyak.

22.>     Kalau manolong indak riya

Suko baragieh basidakah, panyantun kaurang indak, paibo bakeh sibansaik. Ta mambari karano allah bukan maharok pambalasan apolai pujian dapek sanjuang, konon mambangkik jo maamun.

33.>     Kalau bakato indak sombong

Kok roda sadang diateh, kok tampuek sadang bagatah, Sombong takabue bajauehkan.  Sabab inyo sadar jo sunnatullah, bumi bareda jo sumbunyo, alam baputa jo iradat. Kini basah, bisuek kok kariang, nan diateh musti kabawah, disinan rimah bapilieh juo.

44.>     Kalau babantah indak badandam

Kok tumbueh basilang kato, salisieh paham dalam rapek, batuka paham samo gadang inyo bamuko manih juo. Rundiang babateh bainggoan, dapek dirimbo, ilang disamak nan batin pantang kabaranggang.

55>     Kok susah indak tagamang

Nyampang cobaan nan manimpo, awak bansaik panyakik ampie, dunsanak jadi rang lain nan sayang lah jajok pulo, nan inyo baiman tagueh juo. Pantangnyo maupek-upek manyasa manyada untuang.  Atau iduik manyisiah-nyisiah randah diri jo samo gadang, raso minder kato rang kini.

66.>     Kalau disapo indak panyingguang

Kok ado nan banasehat, datang kritik dari kawan tibo bandiangan dari kawan jo suko hati ditarimo. Bukan marabo mamburengeh, emosi nak manang surang, urang sayang disangko jajok. Bukan. Kok talanglah inyo suruik, kok tadorong inyo kumbali rila jo maaf dipohonkan.

77.>       Kok bagaue indak pambingik

Mancaliek kawan nan sadang jatueh asok, kawan nan sadang tagak tali, haram kok inyo raso bingik. Sukur  taloncek dimuluiknyo, mambayang suko diparoman gilo mamuji jo manyanjuang. Berbagi rasa caro aluihnyo