1
>
Dangakan juo kato surueh susunan urang cadiek
pandai, salapan pulo bilangannyao..
1> Nak luruih rantangi tali
Bajalanlah dialue adat,
bakatolah diateh undang. Kalau mamaek ditantang barih, mangabuang tibo diukue.
Dialua rasuek manjariau dikasau lakekan atok.
Maknanyo: latakan sasutu ditampeknyo, dinan wajar. Usah
mambuek-buek. Kadang-kadang dek lamak rayuan tukang galueh, gadang batuka jo
nan ketek. Kain ganieh diago urang marekan naan banonyokkan. Jangan.
Ikhlas-ikhlas kalau baragieh,
jujur-jujur kalau manolong, adil-adil kalau mahukum. Usah lamak karano santan,
jan kuniang karano kunik, dek sanjuang iko nan bana, USAH.
Satiok kato ka disabuik atau
kakok ka diawai, batuekan niaik labieh dulu. Tanyolah ka hati nurani naiekan
katimbang raso, cupak jo gantang dalam batin, lai koh dalam izin allah.
Kok lai itu taamakan, kalawang
indak talacah karimbo indak kanai miang. Baliek batimba baagieh makan ateh bawah ayunan kapak, nan bana disabuik
juo.
2> Nak tinggi randahkan hati
Jikok bakato dibawah-bawah,
manyauek dilie-ilie, mamacik diujuang-ujuang. Usah panyonsong kecek urang usah
pamaha jo pujian. Nan tuo dianjuang-anjuang, nan ketek disayang-sayang, nan
bansaik sapo dahulu. Insyaallah nak tinggi pandangan rangkeh awak, datang
kasieh naiek martabat, tuah ka inggok sandirinyo. PICAYOLAH.
3> Nak mulie tapati janji
Bakato usah panduto, bajanji
usah bamungkie. Dibari amanat jan khianat. Kok janji indak tatapeki kok kara indak tataguehi. Mangecek tarajak-anjak,
rundiang nan urak-urak ungkai alamaik kajatueh haarago diri, urang nan indak
picayo lai.
Dek mujue sapanjang hari, dek
malang sakijok mato, kok niat alum tasampaikan. Mako pakaikan pepatah rang tuo:
kato
dahulu batapati, kato kudian bana dicari. Artinyo tamui
bamungko-mungko. Kabakan aral rintangannyo, sinan dibuek janji baru.
4> Nak tagueh paham dikunci
Mangecek siang maliek-liek,
barundiang malam mahagak-agak. Usah taruah bak katidiang ijan taserak bak
anjalai. Lungga pasang ranggang pangabek co lukah indak baincok. Bulieh awak
maiboi, tapi usah sayang tatuntuang kok isuek ka jadi lawan. Kok banci ala
kadarnyo usah diino diudikan antah kok nanti jadi kawan. Nan bak kato rang
tuo-tuo : agiehkan nan saganggam tapi tinggakan nan sabinjek. Cabieklah patuik
dicabiek sahalai banang tinggakan juo. Itulah kaserap panggantuangan.
5> Nak labo jan takuik rugi
Bajarieh mangkonyo bulieh,
barugi mangko balabo itulah undang cadiek pandai. Kok mamnciang tantu yo jo
umpan, manembak tantu jo peluru. Manggaleh nyato bapokok. Kalau dibao ka nan
batin hormatilah urang terlebih dahulu baru awak dihormati urang.
Saincek bijo dituga
Satnadan labek ka gantinyo.
Sasuai bak bunyi pribahasa barang siapa menabur angin, maka kelak menuai
badai.
6> Nak kayo usah barutang
Ukuran kayo sabananyo iyolah
bukan dinilai harato bando konon pulo jumlah pitih timbangan ameh. Tapi kekayaan nan hakiki lataknyo tasimpan
dalam batin. Dijiwa nan tanang di hati
nan lapang dipangana nan salasai. Adopun tando-tando urang kayo inyo kok bajalan
indak tasundak, kok malenggang indak
tapampeh. Galak lapeh kapalo tagak mungko jinah kaniang bakilek. Basoboknyo
katiko batin tak ba baban batin tak barutang.
7> Nak aluih asah lah baso
Nan dimukasuik maasah baso
manih muluik pandai batutue, indak pangiang jo panggisie, tau batenggang ati
urang. Walau urang baniek jaek inyo babudi baiek pulo. Basuo bapantun urang kahandai-handai di nan
mudo.
Anak siamuek dalam
padi
Cuko didalam
pabarasan
Sunggueh ramuek
dalam hati
Dimungko indak
kabakasan
8> Nak elok baiekkan sangko
Kok kasa etongan urang,
senjang tadanga rundiangannyo. Tarimo
suko lah dahulu antah kok elok mukasuiknyo.
Usah lakeh pancimburuan jan pandorong
salah sangko. Tapi kunyah-kunyah mangko dilulue, gamak-gamak mangko dipacik
mano tau dek awak pamburuak sangko, baluik baraso ula juo. Alun anyuik lah
kadinginnan, alun jatueh gamang dahulu., kudian baru manyasa.
Inokkan bana
jaleh-jaleh, ambiek katelong ka pidoman. Jan tasorong langkah di nan
dalam usah tataruang di nan data, salamaik badan manyubarang. Wassalam.. J :D
Tidak ada komentar:
Posting Komentar